تاج..من جديد

د. نسرين رضي الله عنها بعتتلي تاج
المطلوب أكتب 10 أشياء عن نفسي
بعد الاتكال على الله نبدأ
بس ما حد يقولي انت متناقض
أو كيف هالصفات مجتمعة مع بعض
لأني عارف نفسي حالة فريدة في الكون:D

1)
اسمي بهاء فلسطيني الأصل والسكن
عمري 28 سنة
درست صحافة وعلوم سياسية وبحب الأدب العربي جدا

2)
بحب الهدوء جدا جدا
وبحب أقعد لوحدي وأقفل الباب على نفسي
وما أكلم حد ولا أشوف حد
وفي نفس الوقت بحب جلسات الأصدقاء
وبشارك وبضحك
وبستمتع في الأماكن اللي أنا بختارها بنفسي
مش اللي بكون مجبر أروحها لأسباب عديدة

3)
هادي لدرجة شديدة
وممكن أقعد ساعات ما أتكلم مع حد
ولا أبتسم ونشغل مع نفسي وبس
وأحيانا بحكي كثير
خصوصا لما أكون مبسوط
أو لما يكون موضوع عاجبني

4)
عصبي في بعض الأحيان
وسهل استفزازي
بس مش دايما بظهر عصبيتي
ولما بكون مستفز كتير بصرخ
وممكن ما أضبط نفسي
بس بهدأ بسرعة وبنسى

5)
بحب الأفلام الأجنبية أكتر من العربية
والأفلام اللي لها قصة
قصة حقيقية أو خيالية لكنها إنسانية
بحب أفلام الكونغ فو شغل الصين
وبكره أفلام الرعب
مش لأني بخاف
بس لأني بحس أغلبها مقرف
وبكره الهندي كمان

6)
بحب الأناشيد الهادية
ويا سلام على القديم
أبو راتب، أبو مازن، أبو الجود
ومجموعة من الجدد
وبكره الأناشيد اللي صوتها عالي وصراخ
إلا في المهرجانات وأشياء بدها حماسة
وبحب الموسيقى الهادية
وأغاني لها معنى
وتحس ان فيها فن

7)
بحب الناس تعاملني زي ما بعاملها
واللي بعطيه اهتمام خاص يبادلني نفس الاهتمام
بكره الأسئلة الكثيرة
وتكرار نفس السؤال أكثر من مرة
وبكره حد يتدخل في خصوصياتي مهما كان قريب
وما بحب حد يناقشني في شيء أنا مقتنع انه صح
وما بحب حد يعطيني درس في المثاليات وهو بعيد عنها

8)
ممممممم
بعض الناس بقولوا عني بئر غميق
صعب تفهم اللي جواه
وبعض الناس بتقول اني كتاب مفتوح
أو لو تطلع في عيوني بتفهمني
وأنا شايف إني الاتنين مع بعض:)

9)
بحب الألوان الهادية
زي الأزرق سماوي
وفي كل شيء بحب لون معين
يعني البني في اللبس
وكمان أسود وأبيض
وبكره الألوان الفاقعة
وبحب النظافة والترتيب
خصوصا في اللبس والشكل
لأني كثير بتكون أوراقي مش مرتبة:)

10)
بحب أنام بعمق
وما حد يزعجني في النوم
وخصوصا بنت أخوي الصغيرة:(
ولما بشتغل بحب أكون مضغوط
وبستمتع لما بتعب كثير في شغلي
أو أشتغل لدرجة إني أنسى آكل
أو ما آخد كفايتي من النوم

أظن هيك صاروا 10 أشياء وبكفي:)
يمكن نسيت أشياء
بس هذا بصفة عامة أنا

ويمرر التاج لكل من

أسماء...همسة قلم
علا...من غزة
عبد الرحمن...خربشة غريب